கலர் மாவு

அரிசி மாவு, கோதுமை மாவு எல்லாம் தெரியும் அது என்ன கலர் மாவுன்னு யோசிக்கிறீங்க தானே.. ப்ளே டோ – play dough ன்னு நீங்க எல்லாம் விளையாடுவீங்களே அதுக்கு நாம் வைச்சிருக்கிற பெயர்தான் கலர் மாவு.

கடையில் வாங்குகிற கலர் மாவு சின்ன டப்பாவில் கொஞ்சமா இருக்கும். விலை கம்மியா இருந்தா நல்லா இழுக்க வராது. விலை அதிகமாக வாங்கினாலும் ஒரு வாரத்தில் எல்லா கலரும் கலந்திட அம்மாகிட்ட திட்டு வாங்கனும்.

யோசிச்சிப் பாருங்க.. வீட்டிலேயே ப்ளே டோ செஞ்சா எப்படி இருக்கும்? கலர் கலரா.. வேண்டும்கிற வண்ணத்தில்.. விலை ரொம்பவே குறைவாக.. அத்துப்படி முடியும் னு கேக்கறீங்களா? இதோ.. இப்படித்தான்👇👇

தேவையான பொருட்கள்:

1.மைதா மாவு – 1கப்

2.தண்ணீர் -1/2கப்

3.எண்ணெய்- 4டீஸ்பூன்

4.Food colours- மஞ்சள், பச்சை, சிகப்பு, ஆரஞ்ச்(இன்னும் பல வண்ணங்களில் அருகிலிருக்கும் கடைகளில் கிடைக்கும். விலை- 1புட்டி 10லிருந்து 15ரூபாய் வரை)

ஒரு அகண்ட வாய் உள்ள கோப்பையில் மைதா மாவை எடுத்துக்கோங்க. அதில் கொஞ்சம்‌கொஞ்சமாய் தண்ணீர் சேர்த்து சப்பாத்தி மாவு மாதிரி பிசைஞ்சிக்கோங்க. மாவை நான்கு சம பகுதிகளாகப் பிரிச்சி, தட்டில் எடுத்துக்கோங்க.

நம் கோப்பையிலேயே சிறிதளவு கலர் பவுடரை எடுத்து அதில் இரண்டு மூன்று சொட்டு தண்ணீர் எடுத்து கலந்துக்கோங்க. பின் எடுத்து வைத்திருக்கும் ஒரு பகுதி மாவை அதில் வைத்து நல்லா பிசைங்க. மாவில் வண்ணம் சமமாகப் கலக்கும் படி அழுத்திப் பிசைந்த. அதன்பின் 4டீஸ்பூன் எண்ணெய் ஊற்றி பிசைந்தால் மாவு உங்கள் கையில் ஒட்டவே ஒட்டாது.

இது போலவே ஒவ்வொரு பகுதி பாவிக்கும் ஒரு‌வண்ணம் கலந்து பல வண்ணங்களில் கலர் மாவு செய்து அதைக் கொண்டு பொம்மைகள் செய்து விளையாடலாம்..

அனிதா செல்வம்

நான்‌அனிதா செல்வம்.‌ தென் தமிழகத்தில் சிறு ஊரில் பள்ளிப்படிப்பு, சென்னையில் கல்லூரிப் படிப்பு, மருத்துவராகப் பணி.. எழுத்துப்பணியில் அனுபவம்: சில சிறுகதைகள், ஒரு குழந்தைகளுக்கான கதைத்தொகுப்பு, இரண்டு நாவல்கள். இவற்றை விட இந்த மின்னிதழின் ஆசிரியர் குழுவில் இருப்பதற்கு எனக்கிருக்கும் பெரிய தகுதியாக நான் கருதுவது, எனது வாசித்தல் பயணம்தான். ஆறு வயதில் எழுத்துக்கூட்டி படிக்கத் தெரிந்த நாள்‌முதல் வாழ்வின் எல்லா சூழ்நிலையிலும் என் உற்ற துணையாய் இருப்பது புத்தகங்களே.. ‘யான் பெற்ற இன்பம் பெறுக இவ்வையகம்’ என்ற எண்ணத்தில் விழுந்த வித்துதான் இந்த மின்னிதழ். இது தளிராய் வளர்ந்து விருட்சமாய் மாறி, நம்‌தமிழ் குழந்தைகள் ஒவ்வொருவரையும் சென்றடைய வேண்டும்.