பச்சைக்கிளியே பறந்து வா

பச்சைக் கிளியே பறந்து வா
பாடம் படிக்க விரைந்து வா
சிவந்த அலகால் எழுத வா
சிறகை விரித்து சீக்கிரம் வா

பாட்டும் கதையும் படிக்க வா
பண்ணிசையும் நீ பயில வா
ஏட்டில் எழுதிப் பழக வா
எண்ணும் எழுத்தும் கற்க வா

அழகுத் தமிழைக் கற்க வா
அலகால் கொஞ்சிப் பேச வா
பின்னும் பல மொழி கற்க வா
பைங்கிளியே நீ பறந்து வா

கணக்குப் பாடம் கற்க வா
கிள்ளையே நீ கிளம்பி வா
உனக்குப் புரியும் வகையிலே
சொல்லித்தருவேன் உடனே வா

ஒன்று இரண்டு எண்ண வா
எண்ணி எண்ணி எழுத வா
கூட்டல் கழித்தல் பயில வா
கூட்டக் கணக்கை அறிய வா

பச்சைக் கிளியே பறந்து வா
பாடம் படிக்க விரைந்து வா
படித்து முடித்தப் பின்னாலே
பழங்கள் தருவேன் வா வா வா